நாங்களும் மனுசங்கதான் சார்..

 

ஓசூரில் இருந்து பெங்களுருக்கு சேலம் கோட்ட அரசு பேருந்தில் நான் பயணம் செய்தேன்.. அப்போது பேருந்து வெகு நேரம் டிக்கெட் ஏற்றிக்கொண்டு இருந்தது.. டிரைவர் வண்டியை அரக்கி அரக்கி நகர்த்திக்கொண்டு இருந்தார்.

சரி போனால் போகின்றது என்று அமைதியாக இருந்தால் பைபாஸ் பாலங்களை தவிர்த்து கர்நாடக எல்லையில் இருக்கும் சின்ன சின்ன ஊர்களில் எல்லாம் நிறுத்தி மெஜஸ்ட்டிக் மெஜஸ்ட்டிக் என்று தொண்டை தண்ணி வற்றுவது போல கத்திக்கொண்டு இருந்தார்...

நான்  பேருந்தில் கண்டக்டர் உட்காரும் முன் சீட்டில்  உட்கார்ந்து கொண்டேன்..டிரைவர் ஹான்சை வாயில் அடக்கி கொண்டு சாது போல அமைதி காத்த படி பேருந்தை ஓட்டினார்...டிக்கெட் போட்டு ஸ்டெஜ் குளோஸ் செய்து விட்டு என்ஜீன்மேல் வந்து உட்கார்ந்த கண்டக்டரிடம் பேச்சு கொடுத்தேன்...

ஏன் இத்தனை ஸ்டாப்பில் நிறுத்தி செல்லுகின்றீர்கள் என்று கேட்டதுதான் தாமதம்.. மடை திறந்த அணையில் இருந்து சீறிப்பாயும் நீரை போல கொட்டத்தொடங்கிய விஷயங்கள் கோர்வையாக இல்லாவிட்டாலும் கிழே அவர் சொன்ன அத்தனை விஷயத்தையும்  பொய் கலப்பில்லாமல் சொல்லி இருக்கின்றேன்...

நாங்களும் மனுங்கதான் சார்.. உங்க அவசரம் தெரியாமலா சீட் ஏத்தறோம்...?? என்ன செய்ய???  சில பொறம் போக்குங்க ஐஏஎஸ் படிச்ச திமிர்ல எங்களை வாட்டி எடுக்கறானுங்க..?? கலெக்ஷன் காட்டு கலெக்ஷன்  காட்டுன்னு படுத்தி எடுக்கறானுங்க...

நாங்க என்ன  சார் செய்வோம்  ரோட்டுல போறவனை எல்லாரையும் அடிச்சி இழுத்து போட்டா டிக்கெட் கொடுக்க முடியும்...??

சார் நாளும் கிழமைன்னா பராவாயில்லை இல்லை விடுமுறை நாள் என்றால் பரவாயில்லை... கூட்டம் அலை மோதும் கலெக்ஷன் பிரச்சனை இல்லை.. ஆனா சாதாரண நாளில் அதே கலெக்ஷனை அதே ரூட்டுல காட்டுன்னு சொன்ன நாங்க என்னசார் செய்யறது..????

எட்டு டன் இருந்த பஸ்.. இப்ப ஆறு டன்னா மாத்திட்டாங்க... வண்டி தக்கை போல ஆயிடுச்சி.... காரணம் டீசல் கொடுக்கனும்றதுதான் காரணம்..

தனியார் பஸ் எல்லாம் பக்கான்னு எல்லா பேசஞ்சரும் சொல்லறாங்க.. ஏன் இருக்காது... இங்க மெயின்டெயின் செய்யவும் பேர் பார்ட்டஸ் மாத்திகொடுக்கவும் தவமா தவம் கெடக்கனும்..

ரோடு மோசம்.. ஆனா டயர் வெடிச்சாலோ அல்லது கல்லடி பட்டாலோ என்னவோ  நாங்க வேனும்ன்னு கத்தியால கிழச்சிது போல நிக்க வச்சி கேள்வி மயிரை கேட்டபானுங்க....

எங்க நீங்கலே சொல்லுங்க.. தமிழ்நாட்டுல ரோடு எப்படி இருக்குதுன்னு?? கிருஷ்ணகிரியில் இருந்து பாண்டிச்சேரி போற ரோட்டை பார்த்துட்டு அந்த கேள்வியை கேட்டா பரவாயில்லை...ஆனா கொஞ்சம் கூட மனசாட்சி இல்லாம கேள்வி கேட்பானுங்க..

சரி பொறுமையா போன...  20 வருஷம் ஓட்டி சர்விஸ் வச்சி இருக்கும் டிரைவர்கிட்ட, இறங்கும் போது  பேசஞ்சர் இதுக்கு முன்ன ஊர்ல கட்டவண்டி ஓட்டினியான்னு சொல்லிட்டு இறங்கறான்.. எங்க கஷ்ட்டம்  அவனுக்கு எங்க தெரிய போவுது...???

இப்ப ஓசூர்ல இருந்து பெங்களூர் போயி அங்க இருந்து பாண்டிச்சேரி போயி,  திரும்ப  பெங்களுர் வரனும்.. மொத்தம் போக வர 850கிலோ மீட்டர் ஆனா அங்க போய் டிரைவர் மாறமாட்டர்.. அதே ஆளுகிட்ட எக்ஸ்ட்ரா டூட்டின்னு சொல்லி திரும்ப உடனே போக சொல்லுவாங்க..

இந்த 850 கிலோ மீட்டர் ஓட்றறவனுக்கு ரெஸ்ட் எத்தனை நிமிஷம் தெரியுமா? வெறும் 15 நிமிஷம்தான்...வயித்தை கலக்கி வண்டி ஓட்டிகிட்டு வர டிரைவருக்கு உடம்பு சூட்ல 15 நிமிஷத்துல சரியா பாத்ரூம் கூட வராது..??அப்புறம் ஏன் விபத்து நடக்காது..??

மேலதிகாரிகிட்ட ஐயா எனக்கு ரொம்ப டயர்டா இருக்குன்னு சொல்லிப்பாருங்க... சரின்னு ரெஸ்ட் கொடுப்பான் ஆனா அதுக்கு அப்புறம் டூட்டி ஏறுவதற்க்கு எப்படியும் ஒரு வாரம் ஆக்கிடுவானுங்க.... அப்படியே டூட்டி கொடுத்தாலும் அது ரொம்ப ரொம்ப கண்டம்மான ரூட் மற்றும் பஸ்சா இருக்கும்..

ஒரு பனிஷ்மன்ட் போலன்னு வச்சிக்கிங்க.. சரி அதுக்கு போவலன்னா..?? டூட்டி செய்ய சொன்னா செய்யவில்லைன்னு குறிப்பு எழுதிடுவாங்க...

டீசல் டீசல்னு உயிரை எடுத்த காரணத்தால் திருச்சிகிட்ட டீசல் சிக்கனம் பண்ண ஆப்போசிட் ரூட்ல போன அரசு பேருந்து தனியார் பேருந்து மோதி 15 பேருக்கு மேல ஸ்பாட்  அவுட்.

பொதுமக்களுக்கு மின்சாரம் எப்படியோ அப்படித்தான் போக்குவரத்தும்.. ஆனா  எங்களை விட மின்சார ஊழியர்களுக்கு, எங்களை விட சம்பளம் அதிகம்.. ஆனா எங்களுக்கும் அவுங்களை விட சம்பளம்  கம்மி...

டீ விலை இரண்டு ரூபா வித்த காலத்துல இருந்து பஸ் டிக்கெட் ஃபேர் ஏத்தலை..இன்னைக்கு அப்படியா டீ ஐந்து ரூபாய்க்கு விக்கறான்.. ஆனா இரண்டாரூபாவுல நினைச்ச இடத்துக்கு போய் வர்ரீங்க... என்ன செய்ய??

அதே போல படிக்கற பசங்க எல்லாருக்கும் பிரி... டிரெயின்ல கூட மாசம் ஒரு 100ரூபாய் பணமாவது வாங்கறானுங்க.. இங்க அப்படி இல்லை.,...

அதே போல மென் பவர் தேவையான அளவுக்கு இல்லை...போக்குவரத்து கழகத்துல இருக்கற  முக்கால்வாசி டிரைவர் டாஸ்மார்க்லதான் பழியா இருக்கான்...ஒன்னாம் தேதி சம்பளம் வாங்கிட்டு டாஸ்மர்க் போனா, அடுத்த நாள் காலை சிங்கள் எடுக்க டிரைவர் வர மாட்டேங்கிறான்.. எக்ஸ்ட்ரா டூட்டிக்கு ஆசைப்பட்டு கண் விழிச்சி ஓட்டுவதால் மானிக்சந்,ஹண்ஸ்,மாவா,பான்பராக் எல்லாம் போட்டு உடம்பை கெடுத்துக்கறாங்க..

டிரைவருங்களை உறுதி மொழி எடுப்பது போல கையை நேரா நீட்டி நிற்க்க  சொல்லுங்க.. எல்லாரோட கையும் தட தடன்னு ஆடும்..அதே போல சரக்கு சரக்குன்னு அடிச்சி வாழ்க்கையை முடிச்சிக்கற டிரைவருங்கதான் அதிகம்...45 வயசுக்கு மேல திடக்காத்திரமான டிரைவருங்க பத்து பர்சன்ட்பேர்தான் இருப்பாங்க...

இந்த அரசியல்வாதிங்க தொல்லை அதுக்கும் மேல... வட்டம் மாவட்டம்னு லட்டர் வாங்கிட்டு வந்துட்டு,நாலு பேர் நைட்டு ஊருக்கு போற கிராமத்துக்கு எல்லாம் பஸ் விடச்சொன்னா அப்புறம் நஷ்டத்துல போவாம லாபத்துலயா போவும்..லாப நோக்கம் இல்லாம நடத்தற ஒரு நிறுவனம் என்பதால் நிறைய அட்வான்டேஜ் எடுத்துக்கறாங்க...

ஏற்கனவே நஷ்டத்தில் போயிகிட்டு  இருக்கு... இது போக்குவரத்து அமைச்சர்   பத்து பஸ் புது வழித்தடத்துல விட்டா அதுக்கு விழா எடுத்துட்டு இரண்டு லட்சம் விழா செலவுன்னு கணக்கு எழுதறானுங்க.. இப்படி இருந்தா எப்படி விளங்கும்..

தோ வர மாசம்  எங்களுக்கு சம்பளம் வருமா வராதான்னு தெரியலை.. கண்டக்டர் டிரைவருக்கு வேனா சம்பளம் கொடுப்பாங்க.. காரணம் வேலைக்கு வரனும் இல்லையா? டெக்னிஷியனுக்கு லேட்டாதான் கிடைக்கும் போல...டிச்ம்பர் மாசத்துல பஸ் பேர் ஏத்தினாதான் ஓரளவுக்கு சமாளிக்க முடியும்..

எவ்வளவோ கஷ்டப்பட்டு ராப்பகலா கண்விழிச்சி வேலை செய்யறோம்... நோவாம ஏசி ரூம்ல உட்கார்ந்துகிட்டு அது நொட்டை இது நொள்ளைன்னு ஏன் கலெக்ஷன் இல்லை?? ஏன் டயர் போயிடுச்சி? ஏன்லேட்டு?? ஏன் டீசல் கொடுக்கலைன்னு? ஏன் ஸ்பிடா வந்தே?  படுத்தி எடுக்கறானுங்க பாருங்க அதுதாங்க ரொம்ப கொடுமை...

நாங்களும் மனுசங்கதான் சார்..

 பிரியங்களுடன்
ஜாக்கிசேகர்.

நினைப்பது அல்ல நீ
நிரூபிப்பதே நீ.....
EVER YOURS...